ស្ទូឌីយ៉ូរបស់ Yutaka មានទីតាំងនៅជាយក្រុងសៃតាម៉ា ឆ្ងាយពីភាពអ៊ូអរនៅកណ្ដាលទីក្រុង។ នៅពេលអ្នកឈានជើងចូលក្នុងស្ទូឌីយ៉ូភ្លាមៗ អ្នកទទួលបានការស្វាគមន៍ពីវត្ថុតាំងលម្អ និងស្ទីគ័រជាច្រើនដែលឆ្លុះបញ្ចាំងពីសេចក្ដីស្រឡាញ់របស់គាត់ចំពោះវប្បធម៌កីឡាជិះក្ដារស្គី និងតន្ត្រីបែបកន្រ្តាក់អារម្មណ៍—ធាតុដែលកំណត់អត្តសញ្ញាណសិល្បៈរបស់គាត់យ៉ាងច្បាស់។ ហ៊ុំព័ទ្ធដោយឥទ្ធិពលវប្បធម៌ទាំងនេះ Yutaka ផ្ដោតអារម្មណ៍យ៉ាងខ្លាំងទៅលើការងាររបស់គាត់ ដោយបង្កើតស្នាដៃរបស់គាត់ដោយផ្ទាល់យ៉ាងប្លែកពីគេ។ តើគំនិត និងបរិយាកាសបែបណាដែលផ្ដល់នូវការបញ្ចេញអារម្មណ៍របស់គាត់តែមួយគត់ ដែលអាចសម្គាល់បានភ្លាមៗថា ជារបស់គាត់?

――តើផ្ទៃរចនា ឬគំនិតអ្វីខ្លះដែលមានវត្តមាននៅក្នុងស្នាដៃសិល្បៈរបស់អ្នក?

ខ្ញុំសង្ឃឹមថា អ្នកទស្សនាអាចដឹងពីខ្លឹមសារនៃការរចនារបស់ជប៉ុនបែបបុរាណ តាមរយៈស្នាដៃរបស់ខ្ញុំ។ ខ្ញុំយកលំនាំគំនិតពីស្លាកប្រអប់ឈើគូសបែបបុរាណ និងការផ្សាយពាណិជ្ជកម្មចាស់ៗ ដែលខ្ញុំមានចេតនាបញ្ចូលទៅក្នុងស្នាដៃរបស់ខ្ញុំ។

――តើនៅពេលណាដែលអ្នកចាប់ផ្ដើមស្គាល់ការរចនាបែបប្រពៃណីរបស់ជប៉ុនទាំងនេះ? តើមានផលប៉ះពាល់ ឬបទពិសោធជាក់លាក់ដែលជំរុញចំណាប់អារម្មណ៍របស់អ្នកដែរឬទេ?

ខ្ញុំតែងតែចូលចិត្តវប្បធម៌អាមេរិក ជាពិសេសកីឡាជិះក្ដារស្គី ផ្ទាំងគំនូរ ការចាក់សាក់ និងតន្ត្រីបែបកន្រ្តាក់អារម្មណ៍ជាដើម។ ចំណង់​ចំណូល​ចិត្ត​នេះ​បាន​ជំរុញ​ឱ្យ​ខ្ញុំ​មាន​ការ​ចាប់​អារម្មណ៍​​ទៅ​លើ​សិល្បៈ​ដែល​ពាក់ព័ន្ធ​គ្នា ហើយ​ខ្ញុំ​បាន​ចាប់​ផ្ដើម​ធ្វើ​ត្រាប់​តាម​រចនាបថទាំង​នោះតែម្ដង។ ទោះជាយ៉ាងណាក៏ដោយ ការធ្វើដំណើរទៅក្រៅប្រទេសបានធ្វើឱ្យខ្ញុំដឹងថា ការបង្កើតសិល្បៈតាមបែបប្រពៃណីរបស់ប្រទេសដទៃ អំឡុងពេលរស់នៅក្នុងប្រទេសជប៉ុន ធ្វើឱ្យខ្ញុំមានអារម្មណ៍ថា ជាការយកតម្រាប់តាមគេតែប៉ុណ្ណោះ។ ខ្ញុំ​មាន​មោទនភាព​ជាតិ​ជាខ្លាំង​ក្នុង​ចំណោម​ប្រជាជន​អាមេរិក និង​អឺរ៉ុប ដែល​ធ្វើ​ឱ្យ​ខ្ញុំ​គិត​ឡើង​វិញ​ពី​របៀប​ដែល​ខ្ញុំ​អាច​បង្ហាញ​ខ្លួន​ឯង​ជា​សិល្បករ​ជប៉ុនមួយរូប។

01
ស្នាដៃមួយបានបង្ហោះនៅលើ Instagram របស់ G-SHOCK នៅថ្ងៃចូលឆ្នាំសកល 2020។ ជាការស្វាគមន៍ឆ្នាំថ្មី ស្នាដៃនេះមានសរសេរសុភាសិត "First Fuji, Second Hawks, Third Eggplants" ដែលបង្ហាញថា ការមើលឃើញនិមិត្តសញ្ញាល្អទាំងនេះនៅក្នុងសុបិនដំបូងនៃឆ្នាំរបស់អ្នក នាំមកនូវសំណាងល្អ ដោយភាពរុងរឿងរបស់និមិត្តសញ្ញាទាំងនេះកើនឡើងជាលំដាប់។ ស្នាដៃនេះរួមបញ្ចូលគ្នាយ៉ាងប្រណីតរបស់ G-SHOCK ជាមួយនឹងរូបព្រះអាទិត្យរះនៅចំកណ្ដាល។

02
ស្នាដៃនេះត្រូវបានគូរលើខ្លែងជប៉ុនចាស់មួយ ដែលត្រូវបានគេទុកចោលនៅក្នុងផ្ទះជង្រុករបស់ Yutaka។ គេបង្កើតស្នាដៃនេះឡើងសម្រាប់កម្មវិធីសិល្បៈជាក្រុមដែលធ្វើឡើងនៅដើមឆ្នាំ 2023 ហើយវាក៏គូរលើផ្ទៃរចនា "First Fuji, Second Hawks, Third Eggplants" ផងដែរ។ ទោះបីជាការដែលមានផ្ទៃរចនាដូចគ្នានឹងស្នាដៃនៅខាងឆ្វេងក៏ដោយ ស្នាដៃផ្សេងគ្នានោះបង្ហាញរូបរាង​ថ្មីសន្លាង។

03
ស្នាដៃនេះត្រូវបានបង្ហាញនៅហាង Vans តាមបណ្ដោយផ្លូវម៉ីជីក្នុងទីក្រុងហារ៉ាជូគុ។ Yutaka បានបង្កើតមគ្គុទ្ទេសក៍ប្លែកៗដែលបង្ហាញពីប្លង់ហាង៖ បន្ទប់ក្រោមដីមានកន្លែងជិះក្ដារស្គី ជាន់ទីមួយត្រូវបានរចនាសម្រាប់ទុកដាក់សម្លៀកបំពាក់ និងជាន់ទីពីរសម្រាប់ទុកដាក់ស្បែកជើង។ ស្នាដៃសិល្បៈបែបជប៉ុន ជួយបង្កើនបទពិសោធសម្រាប់អ្នកដំណើរមកពីបរទេស ដែលអាចឱ្យពួកគេរីករាយនឹងការធ្វើដំណើររបស់ពួកគេកាន់តែរីប្រសើរ។

04
ស្នាដៃនេះត្រូវបានគូរបង្ហាញនៅលើរថយន្ត Pontiac Trans Am​ ឆ្នាំ 1972។ ដំបូងឡើយ មានតែសត្វស្ទាំងមួយក្បាលប៉ុណ្ណោះដែលត្រូវបានគូរលើដំបូលមុខឡាន ប៉ុន្តែបន្ទាប់ពីមានការស្នើឱ្យ​បញ្ចូលដាវជប៉ុន Yutaka បានធ្វើ​តាមការស្នើសុំនោះ។ លើសពីនេះទៀត ផ្នែកខាងក្រោយក៏ត្រូវបានតុបតែងដោយអក្សរកានជី "1972 Trans Am" ផងដែរ។

05
នៅលើជញ្ជាំងមានក្ដារស្គីដែលគូរដោយវិចិត្រករមួយចំនួនដែល Yutaka ចូលចិត្ត។ នៅផ្នែកខាងឆ្វេង គឺជាបន្ទះក្ដារស្គីបានមកពីការជិះក្ដារស្គីបែបរន្ធត់ បង្ហាញពីស្នាដៃសិល្បៈបោះពុម្ពសូត្ររបស់ Pushead។ នៅផ្នែកខាងស្ដាំ គឺជាស្នាដៃមួយប្រភេទដែល Yutaka ជួញដូរជាមួយវិចិត្រករ Yusuke Tsuge ដោយបង្ហាញពីរចនាបថគូរដោយដៃតែមួយគត់របស់គាត់។

06
នេះគឺជាហ្គីតាម៉ូដែល Greco Les Paul ដែលគាត់បានខ្ចីពីបងប្រុសរបស់ Yutaka។ ដោយបាននៅជាមួយគាត់អស់រយៈពេលជិត 30 ឆ្នាំ ហ្គីតានេះធ្វើឱ្យគាត់មានអារម្មណ៍ថា ដូចជាដៃគូយ៉ាងពិតប្រាកដ ជាពិសេសគឺដោយសារហ្គីតានេះជាឧបករណ៍ភ្លេងដ៏សំខាន់សម្រាប់គាត់ នៅពេលដែលគាត់នៅក្នុងក្រុមតន្រ្តី។ បន្ទាប់​ពី​ធ្វើការ​កែ​ពណ៌ និង​ស្ទីគ័រ​តាម​បំណង​បណ្ដើរៗហើយ ឥឡូវ​​រូបរាង​ថ្មីក៏បង្ហាញឡើង។

――តើអ្នកបង្កើតសិល្បៈតាមបែបផែនមួយណា បើគិតរហូតដល់ពេលនោះ? តើ​អ្វី​ដែលបាន​នាំ​ឱ្យ​អ្នក​បញ្ចូល​ការ​រចនា​បែបបុរាណ ​ដូច​ជា​ប្រអប់ឈើគូសបែបបុរាណទាំងនេះ?

ស្នាដៃមុនៗរបស់ខ្ញុំ យកលំនាំតាមការងារចាក់សាក់បែបបុរាណរបស់អាមេរិក និងរចនាបថសាលាថ្មី។ ខ្ញុំក៏មានសេចក្ដីសោមនស្សចិត្តក្នុងការបង្កើតស្នាដៃដែលមានស្មារតីប្រកបដោយភាពច្នៃប្រឌិតបន្តិចផងដែរ។ ទោះបីជាខ្ញុំពេញចិត្តចំពោះផ្ទៃរចនាបែបប្រពៃណីរបស់ជប៉ុន ដូចជា ukiyo-e សម្រាប់ការកម្សាន្ត និងបែបកំប្លែងក៏ដោយ ខ្ញុំក៏បានរកឃើញថា សោភ័ណភាពប្រអប់ឈើគូសពីមុនដែលបានបំភ្លេចចោល និងការផ្សាយពាណិជ្ជកម្មមានភាពអស្ចារ្យមិនគួរឱ្យជឿ។

―― តាមរយៈការវិវត្តស្ដាយល៍របស់អ្នក តើអ្នកធ្វើយ៉ាងណាទើបនៅតែប្រកាន់ខ្ជាប់ការប្ដេជ្ញាចិត្តរបស់អ្នក ដើម្បីបង្ហាញខ្លួនឯងប្រកបដោយសិល្បៈ?

ខ្ញុំ​បាន​គូរ​គំនូរអស់​រយៈពេល​ជាយូរតាមដែល​ខ្ញុំ​អាច​ចាំ​បាន។ កាលនៅក្មេង ខ្ញុំជាអ្នកគាំទ្រដ៏ធំរបស់ Akira Toriyama ដោយការចម្លងតួអង្គពី Dragon Ball និង Dragon Quest។ ម្ដាយរបស់ខ្ញុំមានទេពកោសល្យក្នុងការគូរគំនូរ ដូច្នេះខ្ញុំសុំឱ្យគាត់បង្កើតតួអង្គកំប្លែងទុកឱ្យ​ខ្ញុំព្យួរនៅក្នុងបន្ទប់របស់ខ្ញុំ។ ក្នុងន័យនេះ ឥទ្ធិពលដ៏ធំបំផុតរបស់ខ្ញុំក៏អាចជាម្ដាយរបស់ខ្ញុំផងដែរ។ លើសពីនេះទៀត ជីតារបស់ខ្ញុំ គឺជាគ្រូបង្រៀនសរសេរអក្សរផ្ចង់ ហើយម្ដាយរបស់ខ្ញុំក៏គ្រូបង្រៀនសរសេរអក្សរផ្ចង់ផងដែរ។ ខ្ញុំមានអក្សរផ្ចង់ឈ្មោះសិល្បកររបស់ខ្ញុំគឺ "Yutaka" ដែលបង្ហាញនៅក្នុងស្ទូឌីយ៉ូរបស់ខ្ញុំ។

――តើអ្នកបង្កើតបរិយាកាសបែបណានៅក្នុងស្ទូឌីយ៉ូរបស់អ្នក ហើយតើអ្នកបង្កើតបរិយាកាសបែបនេះតាមផ្នត់គំនិតមួយណា?

ពេល​ខ្ញុំ​បង្កើតស្ទូឌីយ៉ូនេះ ខ្ញុំ​មិន​គិតអ្វី​ច្រើន​ទេ។ ខ្ញុំផ្ដោតអារម្មណ៍ទាំងស្រុងលើ​សកម្មភាពច្នៃប្រឌិត។ ខ្ញុំចំណាយពេលកាន់តែច្រើនក្នុង​សញ្ជឹងគិតដល់គំនូរ និងស្នាដៃសិល្បៈ​លើសពីការគូរជាក់ស្ដែង។ ក្រោយខ្ញុំ​សម្រេច​ចិត្ត​លើ​គំនិត​មួយ ខ្ញុំ​ស្លង់​ទៅរកគំនិតនោះដោយ​គ្មាន​អ្វីអាចរំខានខ្ញុំបានឡើយ។

――តើនៅពេលណាដែលអ្នកមានអារម្មណ៍ថា ដូចជាគំនិតបានបំផុសឡើង?

ខ្ញុំនៅតែមិនអាចកំណត់ថា ពេលណា ដែលគំនិតបានបំផុសឡើងនោះទេ។ ពេលខ្លះ គំនិតផុសឡើងដោយមិនបានរំពឹងទុក ជាពិសេសនៅពេលដែលខ្ញុំមិនបានព្យាយាមក្លែងត្រាប់តាមស្នាដៃមួយ។ ខ្ញុំយល់ឃើញថា ប្រសិនបើខ្ញុំផ្ដោតខ្លាំងពេកលើការបង្កើតគំនិត នោះលទ្ធផលគឺមិនល្អទេ ដូច្នេះខ្ញុំតែងតែទុកគ្រប់យ៉ាងចោលពេញមួយយប់ ហើយពិនិត្យមើលវាឡើងវិញនៅថ្ងៃបន្ទាប់។ ការបំផុសគំនិតអាចប៉ះពាល់ដល់ខ្ញុំ ខណៈពេលដែលខ្ញុំកំពុងធ្វើដំណើរ ឬសូម្បីតែនៅក្នុងបន្ទប់ទឹក—វាពិតជាប្រែប្រួលខ្លាំងណាស់។

―― ស្ដាប់ទៅដូចជាអ្នកកំពុងសញ្ជឹងគិតយ៉ាងជ្រាលជ្រៅអីចឹងដែរ។ តើ​អ្វី​ដែលជំរុញទឹក​ចិត្ត​​ក្នុងការ​បញ្ចេញ​អារម្មណ៍​សិល្បៈ​របស់​អ្នក? តើមាន​សារដែលអ្នក​ចង់​ផ្ដល់ដែរ​ឬទេ?

ខ្ញុំមិនមានសារជាក់លាក់នៅក្នុងចិត្តទេ។ ខ្ញុំសង្ឃឹមថា អ្នកទស្សនាអាចមានអារម្មណ៍អ្វីមួយពីស្នាដៃរបស់ខ្ញុំ។ ជាធម្មតា ខ្ញុំមិនដាក់ចំណងជើងលើស្នាដៃរបស់ខ្ញុំ ឬភ្ជាប់អត្ថន័យស៊ីជម្រៅទៅកាន់អ្នកទស្សនានោះទេ។ ផ្ទុយទៅវិញ ខ្ញុំផ្ដល់អាទិភាពលើផលជះពីរូបភាពមើលឃើញ ដែលផ្ដោតលើសោភ័ណភាពដ៏ប្រណីតសុទ្ធសាធ។ ខ្ញុំផ្ចង់អារម្មណ៍គូរ ដើម្បីឱ្យចេញជារូបរាងដ៏ទាក់ទាញ ដូច្នេះខ្ញុំផ្ដោតលើពណ៌ និងតុល្យភាព ដោយត្រូវយកចិត្តទុកដាក់យ៉ាងខ្លាំងទៅលើទិដ្ឋភាពទាំងនោះ។

01
ធ្នើរដាក់សៀវភៅដែលពោរពេញទៅដោយសៀវភៅ អត្ថបទ និងសម្ភារៈដែលមានផ្លាកសញ្ញាទាក់ទងនឹងសិល្បៈ។ ក្រឡេកមើលទៅឡើង អ្នកនឹងឃើញបណ្ដុំសៀវភៅមគ្គុទ្ទេសក៍ប្លេកម៉េតធល ដែលជាការឆ្លុះបញ្ចាំងពិតៗពីចំណាប់អារម្មណ៍របស់ Yutaka។ គួរឱ្យកត់សម្គាល់ថា ចំណែកមួយគឺសម្រាប់តែ "DOLL" ដែលជាទស្សនាវដ្ដីបង្ហាញអំពីឈុតឆាកតន្រ្តីផាំងរបស់ជប៉ុនពីទសវត្សរ៍ឆ្នាំ 1980 ដល់ឆ្នាំ 90។

02
នៅលើធ្នើរខាងលើតុរបស់គាត់ ជាកន្លែងដែល Yutaka ចំណាយពេលភាគច្រើនរបស់គាត់នៅទីនោះ មានព្យញ្ជនៈជាអក្សរកាន់ជីសម្រាប់ "Yutaka" ដែលសរសេរដោយម្ដាយរបស់គាត់ ដែលជាអ្នកសរសេរអក្សរផ្ចង់ពីវង្សត្រកូលអ្នកសិល្បៈ មុនពេលគាត់ស្លាប់ទៅ។ គាត់នឹកឃើញដោយក្ដីពេញចិត្តពីរបៀបដែលតាំងពីក្មេងមក គាត់សុំឱ្យម្ដាយបង្ហាញតួអង្គតុក្កតាទៅគាត់ ដោយបណ្ដុះស្មារតីច្នៃប្រឌិតរបស់គាត់នេះតាំងពីពេលនោះមក។

03
Yutaka ប្រើ "1 Shot" ដែលជាគ្រឿងពេញនិយមមួយក្នុងចំណោមអ្នករចនាម៉ូតទូទាំងពិភពលោក។ ល្បីខាងភាពទាក់ទាញដ៏ល្អឥតខ្ចោះ និងពណ៌ដ៏រស់រវើករបស់វា ថ្នាំលាបអ៊ីណាមែលនេះ គឺល្អសម្រាប់តុបតែងធុងរថយន្ត និងម៉ូតូ មួកសុវត្ថិភាព និងអ្វីៗជាច្រើនទៀត។ គាត់ក៏ប្រើវាទៅលើបង្អួច ផ្លាកសញ្ញាខាងក្រៅ និងកន្លែងកីឡាជិះក្ដារស្គីផងដែរ។

―― តើមានអ្វីដែលអ្នកធ្វើ ដើម្បីជួយអ្នកក្នុងការផ្ដោតអារម្មណ៍ពេលកំពុងច្នៃប្រឌិតដែរ ឬទេ?

ខ្ញុំស្រឡាញ់តន្ត្រី ដូច្នេះខ្ញុំស្ដាប់តន្ត្រី ដើម្បីបង្កើនថាមពលរបស់ខ្ញុំនៅពេលខ្ញុំធ្វើការ។ ខ្ញុំចូលចិត្តប្រភេទភ្លេងខ្លាំងៗដូចជា ផាំង ម៉េធល់ និងកន្រ្តាក់អារម្មណ៍ ប៉ុន្តែប្រសិនបើខ្ញុំចង់បង្កើតអ្វីដែលគំនូរបែបអន្លង់អន្លោចជាងនេះ ខ្ញុំនឹងស្ដាប់តន្ត្រីដែលកាន់តែផ្អែមល្អែម។ ខ្ញុំតែងតែលេងភ្លេង។

―― អ្នកបានបង្កើតស្នាដៃសម្រាប់ G-SHOCK តើអ្នកអាចចែករំលែកគំនិតរបស់អ្នកនៅពីក្រោយស្នាដៃនេះបានដែរឬទេ?

ខ្ញុំ​ប្រើ​សត្វ​ស្ទាំង​ជា​ផ្ទៃរចនាចម្បង​ក្នុង​ស្នាដៃ​សិល្បៈ​របស់ខ្ញុំ ដូច្នេះ​ខ្ញុំ​បាន​គូរ​រូប​សត្វ​ស្ទាំង​កាន់​នាឡិកា G-SHOCK។ សត្វស្ទាំងតំណាងឱ្យភាពក្លាហាន និងកម្លាំង ដែលខ្ញុំចង់បង្ហាញទាក់ទងនឹងភាពធន់រឹងមាំរបស់ G-SHOCK។ នៅជ្រុងនីមួយៗ ខ្ញុំបានដាក់ការបកប្រែជាភាសាជប៉ុនសម្រាប់ "gravity" និង "shock" ដោយប្រើអក្សរត្រាបុរាណ ដែលដើមឡើយប្រើសម្រាប់​បោះត្រា។ ខ្ញុំក៏បានបញ្ចូលលេខម៉ូដែល “DW-5000R” ជាអក្សរកាន់ជី ដើម្បីបង្ហាញពីការផ្សាយពាណិជ្ជកម្មរបស់ជប៉ុនបែបបុរាណលើការរចនាផងដែរ។

――តើ​ G-SHOCK ​មាន​ន័យយ៉ាងណាចំពោះ​អ្នក?

ខ្ញុំចាំថា ម៉ូដែលនេះមានប្រជាប្រិយភាពតាំងពីទសវត្សរ៍ឆ្នាំ 1990 មកម៉្លេះ។ មិត្តរបស់ខ្ញុំទាំងអស់ធ្លាប់ពាក់វា ហើយខ្ញុំគិតថា ពិតជាឡូយណាស់។ មុនពេលដែលមាន G-SHOCK ខ្ញុំមានអារម្មណ៍ថា នាឡិកាប្រើសម្រាប់មនុស្សធំ ប៉ុន្តែ G-SHOCK បានបំបែកពុម្ពរចនារបស់ខ្លួន ដែលអាចប្រើប្រាស់បានសម្រាប់មនុស្សវ័យក្មេងផងដែរ។ ខ្ញុំពេញចិត្តចំពោះភាពធន់រឹងមាំរបស់វា ដែលអាចឱ្យខ្ញុំផ្ដោតលើការងាររបស់ខ្ញុំដោយមិនខ្វល់ពីភាពកខ្វក់ ឬការខូចខាត។ ខ្ញុំ​រីករាយ​នឹង​សេរីភាព​ដែល​មិន​ចាំបាច់​ផ្ដោត​លើ​រឿង​តូចតាច នៅពេល​ខ្ញុំ​កំពុងបង្កើតស្នាដៃរបស់ខ្ញុំ។

ប្រវត្តិរូប

Gakou Yutaka

ដោយយកលំនាំតាមការរចនាពីស្លាកប្រអប់ឈើគូស "រ៉ាន់ជី" និងក្រាហ្វិកពីសម័យ មេជី តៃហូ និងសម័យសូវ៉ា ដំបូង Yutaka បង្កើតសិល្បៈដែលលាយធាតុចំណាប់អារម្មណ៍សំខាន់ៗរបស់គាត់ចូលគ្នា—ផាំង ប្លេកម៉េតធល កីឡាជិះក្ដារស្គី ការចាក់សាក់ និងស្រាបៀរ—ដែលមានអារម្មណ៍ដឹងពីសោភ័ណភាពបែបប្រពៃណីជប៉ុន។ ការលាយបញ្ចូលគ្នានេះបានទាក់ទាញចំណាប់អារម្មណ៍សម្រាប់ស្នាដៃដើមរបស់គាត់នៅទូទាំងប្រព័ន្ធផ្សេងៗ។

Instagram។ @gakou_yutaka