G-SHOCK បានរក្សាស្មារតីយ៉ាងមោះមុតចំពោះភាពធន់មាំចាប់តាំងពីដំបូងមកជាង 40 ឆ្នាំហើយ។ បច្ចុប្បន្ននេះ នាឡិកា MR-G ក្លាយជាកេរ្តិ៍ដំណែលដ៏ជោគជ័យបំផុត ដោយរួមបញ្ចូលទាំងបច្ចេកវិទ្យាទំនើបៗយ៉ាងរលូន គួបផ្សំនឹងសមត្ថភាពដ៏ប៉ិនប្រសប់ផ្នែកសិប្បកម្មរបស់ជនជាតិជប៉ុនផងដែរ។
នៅក្នុង “ការបង្កើតស្នាដៃសិល្បៈជាមួយ MR-G” យើងជួលវិចិត្រករសហសម័យឱ្យបង្កើតស្នាដៃដែលរួមបញ្ចូលនាឡិកា MR-G ដោយបន្ស៊ីភាពធន់រឹងមាំនៅក្នុងភាពស្រស់ស្អាត និងភាពស្រស់ស្អាតនៅក្នុងភាពធន់រឹងមាំដែលមិនគួរឱ្យជឿ។ យើងស្វែងយល់អំពីការសន្ទនានេះ ដោយស្នើឱ្យវិចិត្រករបញ្ចូលចក្ខុវិស័យច្នៃប្រឌិតរបស់ពួកគេជាមួយនឹងលក្ខណៈសំខាន់របស់នាឡិកា MR-G។ អត្ថបទនៅក្នុងភាគអត្ថបទនេះបង្ហាញពីការបំផុសគំនិតដែលណែនាំវិចិត្រករម្នាក់ៗឱ្យប្រើអារម្មណ៍ច្នៃប្រឌិតរបស់ពួកគេ ដើម្បីបង្កើតទម្រង់ទស្សនវិជ្ជារបស់នាឡិកា MR-G តាមវិធីពិសេសរបស់ខ្លួនផ្ទាល់។
ដំណាក់កាលទីពីរនេះបង្ហាញពីកញ្ញា Natsuki Takayama ដែលជាវិចិត្រករស្វែងយល់អំពីទំនាក់ទំនងរវាងមនុស្ស និងវត្ថុ។ នាងបានប្រើបច្ចេកទេសដែលដើរហួសឆ្ងាយពីទម្រង់ពីរវិមាត្រ និងបីវិមាត្រ ដើម្បីបង្ហាញពីទិដ្ឋភាពពិភពលោកតែមួយដែលមានមនុស្ស សត្វ និងបរិស្ថាន។ យើងបានផ្ដល់នាឡិកាសម្រាប់អ្នកមុជទឹកម៉ូដែល MRG-BF1000R-1AJR Frogman ដើម្បីឱ្យនាងបញ្ចូលចក្ខុវិស័យរបស់ខ្លួន។
ស្នាដៃសិល្បៈរបស់កញ្ញា Natsuki Takayama៖ ការស្ដារទម្រង់ដើមរបស់មនុស្ស “ការមើលឃើញ”
Thustt 04 (ភាពលម្អិត)
រូបថតដោយ Tadayuki Minamoto
ចលនាតូចល្អិតដ៏ស្មុគស្មាញរំលឹកដល់ទឹករលកបក់បោកពីលើផ្ទៃនៃស្នាដៃសិល្បៈ។ បើពិនិត្យមើលឱ្យជិត ទម្រង់បីវិមាត្រត្រូវបានបង្កើតនៅលើផ្ទៃនៃទឹកថ្នាំ ដើម្បីបង្កើតបានជាទិដ្ឋភាព។ វិចិត្រករសហសម័យ Natsuki Takayama ចង់បង្កើតស្នាដៃសិល្បៈដែលធ្វើឱ្យអ្នកមើលយល់ភ្លាមៗ នៅពេលពួកគេមើលឃើញស្នាដៃសិល្បៈនោះ។
“សព្វថ្ងៃនេះ ភាពជឿនលឿនក្នុងវិស័យឧស្សាហកម្ម និងបច្ចេកវិទ្យាព័ត៌មានបានធ្វើឱ្យយើងដឹងកាន់តែច្រើនអំពីផ្នែកទាំងឡាយរបស់ពិភពលោក និងរឹតចំណងទំនាក់ទំនងរវាងវត្ថុដែលយើងអាចបង្ហាញ ឬតំណាង។ តែក្នុងពេលដំណាលគ្នានេះ ខ្ញុំក៏ឆ្ងល់ផងដែរថាតើយើងនឹងបាត់បង់វិញ្ញាណរបស់យើងចំពោះអ្វីៗដែលមិនទាន់ត្រូវបានបង្ហាញ ឬតំណាងទេ។ ឧទាហរណ៍ ប្រសិនបើអ្នកស្វែងរកមហាសមុទ្រនៅកន្លែងណាមួយ អ្នកអាចមើលរូបភាពបាន ប៉ុន្តែអ្វីដែលអ្នកមើលឃើញគឺគ្រាន់តែជាព័ត៌មានប៉ុណ្ណោះ។ ដូច្នេះ តើ ‘ការមើលឃើញ’ មានន័យយ៉ាងណាចំពោះមនុស្សដែលជាភាវៈមានជីវិត? ខ្ញុំព្យាយាមបង្កើតស្នាដៃសិល្បៈដែលអនុញ្ញាតឱ្យមនុស្សយល់ភ្លាម នៅពេលពួកគេជួបអ្វីមួយម្ដងទៀតតាមរយៈការមើលឃើញ”។
Thustt 04 (ភាពលម្អិត)
រូបថតដោយ Tadayuki Minamoto
កញ្ញា Takayama បង្កើតគំនូរលម្អិតដ៏ប៉ិនប្រសប់ទាំងនេះឡើងដោយប្រើវិធីលាយទឹកថ្នាំពិសេសនៅក្នុងស៊ីរាំង និងបាញ់វាចេញ ហើយកាត់ផ្ទៃ និងផ្នែកផ្សេងៗចេញដោយកាំបិត។ វិធីសាស្ត្រនេះបង្កប់នូវភាពលំបាករបស់វិចិត្រករក្នុងការគូរគំនូរដោយមិនប្រើជក់ រួមជាមួយគំនិតដែលផ្ដល់ភាពសំខាន់ចំពោះដំណើរការគូររបស់នាង។
“ឧបមាថា យើងមានទឹកថ្នាំពណ៌ខ្មៅនៅខាងមុខយើង។ ជាទូទៅ យើងហៅវាថា ‘ពណ៌ខ្មៅ’។ ពណ៌ដែលយើងមើលឃើញនឹងភ្នែកទទេហាក់ដូចតំណាងឱ្យពណ៌របស់វា ប៉ុន្តែពណ៌ទាំងនេះរងឥទ្ធិពលពីកត្តាជាច្រើនដូចជា ប្រភពពន្លឺផ្សេងៗគ្នា និងពណ៌ចម្រុះរបស់វត្ថុ។ នោះហើយជាមូលហេតុដោយគ្រាន់តែគូររូបអ្វីមួយដោយប្រើពណ៌ខ្មៅ ឬល្បាយម្សៅពណ៌ដើម្បីបង្កើតជាពណ៌ ធ្វើឱ្យខ្ញុំមានអារម្មណ៍ថានៅខ្វះអ្វីមួយ។ ខ្ញុំបានឈានដល់មកដំណាក់កាលនេះ ដោយសារខ្ញុំស្រាវជ្រាវរកវិធីបង្ហាញការឆ្លុះពណ៌ដែលយើងមើលឃើញជាទូទៅ ដោយរួមបញ្ចូលពណ៌ជាច្រើនជាមួយរលកតូចៗ។
“ខ្ញុំក៏ឱ្យតម្លៃលើទំនាក់ទំនងជាមួយវត្ថុដែលខ្ញុំជួបផងដែរ ពេលកំពុងបង្កើតស្នាដៃសិល្បៈរបស់ខ្ញុំ។ ការបង្ហាញផ្សេងៗគ្នារបស់ទឹកថ្នាំហាក់ដូចជាបានជួយជំរុញខ្ញុំទៅមុខមួយកម្រិតទៀត។ ដំណើរការគូរនេះហាក់ដូចជាមិនមែនជាស្នាដៃរបស់ខ្ញុំតែម្នាក់ទេ។ មានរឿងជាច្រើនរវាងខ្លួនខ្ញុំ និងវត្ថុដែលខ្ញុំអាចដឹងយ៉ាងច្បាស់ ទោះបីជាខ្ញុំមើលមិនឃើញវាក៏ដោយ។ ដូចគ្នានឹងវត្ថុទាំងឡាយដែរ (រួមទាំងមនុស្ស និងទម្រង់ជីវិតផ្សេងទៀត) សុទ្ធតែជាបណ្ដុំនៃអាតូម ដែលក្នុងនោះមានពិភពតូចៗក្នុងកម្រិតដែលយើងហៅថា កោសិកា និងម៉ូលេគុល។ ទឹកថ្នាំបង្កើតបានជាផ្ទៃភាគល្អិតចម្រុះពណ៌ដ៏ស្មុគស្មាញនៅលើផ្ទៃស្នាដៃសិល្បៈរបស់ខ្ញុំ មុនពេលទឹកថ្នាំទាំងនោះស្ងួត។ ខ្ញុំមានអារម្មណ៍ថា ការបង្ហាញអារម្មណ៍នេះកើតចេញពីការបញ្ចូលវិញ្ញាណខាងក្នុងរបស់ខ្ញុំ និងទស្សនៈដែលខ្ញុំទទួលបានពីខាងក្រៅដែលប្រែក្លាយវិញ្ញាណនោះ”។
Tangled Strata ដែលឬសលូតលាស់ (2023)
2000 × 2515 mm ជ័រសំយោគ និងប្រេងនៅលើផ្ទាំងក្រណាត់
រូបថតដោយ Tadayuki Minamoto
ទេសភាពធម្មជាតិដែលវិចិត្រករស្គាល់តាំងពីវ័យកុមារបានជំរុញដល់ការស្រមៃគិតរបស់នាងក្នុងការបង្កើតស្នាដៃសិល្បៈខុសប្លែកពីគេនេះ។
“គ្រួសាររបស់ខ្ញុំបានផ្លាស់ទីលំនៅពីទីក្រុង Iwakuni ខេត្ត Yamaguchi Prefecture ទៅទីក្រុងតូក្យូ នៅពេលខ្ញុំទើបកើត។ ប៉ុន្តែពួកយើងធ្វើដំណើរទៅលេងស្រុកកំណើតនោះនៅថ្ងៃបុណ្យជាតិជានិច្ច។ Iwakuni ហ៊ុមព័ទ្ធជុំវិញដោយភ្នំ និងទន្លេហូរកាត់ ដែលហាក់ដូចជាបរិស្ថានធម្មជាតិដ៏សម្បូរបែប។ អ្នកនឹងឃើញមានសត្វខ្លាឃ្មុំព្រៃ និងសត្វស្វា បើអ្នកនៅលើដើមឈើ។ សូម្បីតែពេលនេះ ដើម្បីបង្កើតស្នាដៃសិល្បៈរបស់ខ្ញុំ ខ្ញុំត្រូវធ្វើដំណើរទៅមើលភ្នំ ពិនិត្យមើលដុំថ្មនៅឆ្នេរសមុទ្រ ប្រមូលវត្ថុផ្សេងៗនៅពេលធ្វើដំណើរ និងអ្វីៗដែលស្រដៀងនោះ។ នៅទីនោះ ធម្មជាតិគឺជាគ្រូដ៏ប្រសើរបំផុត។
“ក្នុងពេលដំណាលគ្នានេះ មនុស្សជួបប្រទះនឹងបញ្ហាបន្ទាន់នានា ដូចជាការរស់នៅក្នុងទីក្រុងទំនើប ការរស់នៅដាច់ដោយឡែកពីគេ និងភាពឯកោ និងការគ្មានអារម្មណ៍ចំពោះវត្ថុពិត ដោយសារការវាតទីរបស់បច្ចេកវិទ្យាព័ត៌មាន។ នៅក្នុងសង្គមមនុស្សដែលអស្ថិរភាពបែបនេះ ការការពារទីកន្លែងដែលយើងមានអារម្មណ៍ថាជារបស់យើងមិនមែនជារឿងងាយស្រួលទេ ប៉ុន្តែខ្ញុំយល់ថា យើងអាចគិតអំពីពាក្យថា ‘កម្មសិទ្ធិ’ ក្នុងន័យទូលាយជាងនេះ។ ដូចទេសភាព satoyama ដែលបរិស្ថានធម្មជាតិ និងមនុស្សជួបប្រសព្វគ្នា ដែលបានក្លាយជាទីកន្លែងកម្មសិទ្ធិរបស់សត្វមានជីវិតជាច្រើន រួមទាំងមនុស្សផងដែរ ខ្ញុំគិតថាធម្មជាតិ និងវត្ថុអាចផ្ដល់ទីកន្លែងដែលជាកម្មសិទ្ធិជំនួស ដោយបន្តមានអត្ថិភាពក្នុងពេលវេលាដែលខុសពីទីកន្លែងរបស់យើង។ ខ្ញុំបង្កើតស្នាដៃសិល្បៈរបស់ខ្ញុំឡើងដោយសង្ឃឹមថា ស្នាដៃរបស់ខ្ញុំ និងទីកន្លែងដែលបានបង្ហាញនៅក្នុងស្នាដៃអាចក្លាយជាទីកន្លែងដែលគ្រប់គ្នាទទួលស្គាល់ផងដែរ”។
ពិភពនៃភាពស្មុគស្មាញ (2020)
4000 × 2500 mm ជ័រសំយោគ ប្រេង និងអំបោះនៅលើផ្ទាំងក្រណាត់
រូបថតដោយ Tadayuki Minamoto
Natsuki Takayama
កើតនៅទីក្រុង Tokyo ក្នុងឆ្នាំ 1990 កញ្ញា Natsuki Takayama បានបញ្ចប់ការសិក្សាកម្រិត MFA ជំនាញវិចិត្រសិល្បៈពីសាកលវិទ្យាល័យ Tokyo Zokei ក្នុងឆ្នាំ 2016។
នាងបង្កើតស្នាដៃសិល្បៈរបស់ខ្លួនដោយប្រើបច្ចេកទេសដែលដើរហួសពីទម្រង់ពីរវិមាត្រ និងទម្រង់បីវិមាត្រ ដូចជាការលាបទឹកថ្នាំដោយប្រើពណ៌ដូចគ្នាជាច្រើន ការចាក់ស្រទាប់ និងការកាត់ទឹកថ្នាំទាំងនោះចេញ។
ការតាំងពិពណ៌សំខាន់ៗរួមមាន “ផ្នែកចំហៀងរបស់ធ្នូដែលបញ្ចេញសំឡេង” (WALL_shinjuku/LUMINE Shinjuku, តូក្យូ, 2024), “ទិដ្ឋភាពពណ៌ខៀវ” (EUKARYOTE, តូក្យូ, 2024), “ការកើនឡើងនៃទឹកជំនន់” (សមាគមសិល្បៈ rin, Takasaki, តំបន់ Gunma, 2024), “កែវភ្នែករបស់ KESHIKI” (សារមន្ទីរសិល្បៈសហសម័យ Nagi, Nagi, តំបន់ Okayama, 2023), “ទិដ្ឋភាពពណ៌ខ្មៅ” (IDÉE TOKYO, តូក្យូ, 2022), “សត្វបក្សីហើរនៅលើមេឃបញ្ឆេះភ្លើង” (NADiff a/p/a/r/t, តូក្យូ, 2022) និង “ការតាំងពិពណ៌ VOCA ឆ្នាំ 2020” (សារមន្ទីរ Ueno Royal, តូក្យូ, 2020)។
ការគិតអំពីពេលវេលាដែលចំណាយនៅក្រោមទឹក
ពេលកញ្ញា Takayama ចាប់កាន់នាឡិកា MRG-BF1000R-1AJR នាងបាននិយាយថា នាងភ្ញាក់ផ្អើលនឹងចំនួនមុខ និងទ្រនិចនាឡិកាដែលបានរួមបញ្ចូលនៅក្នុងការរចនា។
“សម្រាប់មនុស្សដែលស៊ាំនឹងការចំណាយពេលវេលានៅលើដី ពេលវេលានៅក្រោមទឹកដែលវាស់ដោយនាឡិកា MR-G Frogman អាចចាត់ទុកថាជាចំនួនពេលវេលាដែលនៅសល់សម្រាប់ការដកដង្ហើម និងការរួចជីវិត ហើយនេះគឺជាគោលគំនិតខុសពីពេលវេលាធម្មតានៅក្នុងជីវិតរស់នៅប្រចាំថ្ងៃ។ ពេលខ្ញុំក្រឡេកមើលនាឡិកានេះជាលើកដំបូង ខ្ញុំសម្គាល់ដឹងពេលវេលាជាច្រើនដែលមាននៅលើមុខនាឡិកានេះ។ ក្នុងពេលជាមួយគ្នានេះ ខ្ញុំចាប់ផ្ដើមចាប់អារម្មណ៍នឹងភាពផ្ទុយគ្នារវាងពេលវេលានៅក្រោមទឹក និងពេលវេលាដែលយើងវាស់នៅក្នុងជីវិតរស់នៅប្រចាំថ្ងៃ”។
ការទទួលអារម្មណ៍ប៉ះនាឡិកាបានបង្កើតជាចក្ខុវិស័យដ៏ច្នៃប្រឌិតរបស់កញ្ញា Takayama។ បន្ទាប់ពីបានទៅទស្សនកិច្ចនៅរោងចក្រ Yamagata Casio និងមើលឃើញពីទីតាំងផលិតកម្មរបស់រោងក្រ បានធ្វើឱ្យនាងពង្រីកគោលគំនិតបន្ថែមទៀត។
ក្នុងចំណោមបច្ចេកវិទ្យាទំនើបៗដែលនាងបានឃើញនៅរោងចក្រ Yamagata Casio អ្វីដែលធ្វើឱ្យនាងចាប់អារម្មណ៍បំផុត គឺដំណើរការដែលមានភាពជាក់លាក់បំផុតដែលគាំទ្រដល់ការផលិតនាឡិកា MR-G។ បច្ចេកទេសចាក់ពុម្ពដ៏ទំនើបដែលសំខាន់ចំពោះបច្ចេកវិទ្យាផលិតនាឡិកា MR-G ផ្ដាច់មុខអាចឱ្យយើងដំណើរការជ័រឱ្យមានវាយនភាពដូចលោហដែលសុក្រឹតក្នុងកម្រិតណាណូម៉ែត្រ (មួយពាន់លានដងនៃមួយម៉ែត្រ)។
“ខ្ញុំមានអារម្មណ៍ថា ខ្ញុំបានមើលឃើញវត្ថុធាតុថ្មីដែលខ្ញុំមិនធ្លាប់ឃើញពីមុនមក។ ខ្ញុំពិតជាចាប់អារម្មណ៍នឹងវិធីនៃការបង្កើតអ្វីមួយថ្មី ដោយរក្សាបាននូវមុខងារកាន់តែប្រសើរជាមួយនឹងភាពរឹងមាំធន់នឹងវត្ថុធាតុ។ ខ្ញុំយល់ស្របនឹងវត្ថុធាតុដែលឆ្លងកាត់ការប្រែប្រួលតាមបែបធម្មជាតិ។ ថ្ម Malachite ដែលខ្ញុំប្រមូល គឺត្រូវបានបង្កើតពីដំណើរការធម្មជាតិ ដូចជាការបំបែកទង់ដែងដោយកាបូនឌីអុកស៊ីត (CO2) ឬទឹកក្រោមដី និងការកកើតកំហាប់សមាសធាតុទង់ដែង។ ធាតុបរិស្ថានក្នុងតំបន់ និងទម្រង់របស់វត្ថុធាតុរួមបញ្ចូលគ្នា ដើម្បីបង្កើតជាសារធាតុថ្មីនេះ។
“ដូចគ្នានេះដែរ ខ្ញុំយល់ថាការរួមបញ្ចូលបច្ចេកវិទ្យាដែលបង្កើតឡើងដោយមនុស្សជាមួយនឹងលក្ខណៈរបស់វត្ថុធាតុ បង្កើតបានជាវត្ថុធាតុប្រភេទថ្មី។ ខ្ញុំដឹងពីវិធីប្រមើលមើលវែងឆ្ងាយនៅក្នុងការរួមបញ្ចូលនេះ ដែលវាមិនត្រូវបានចងភ្ជាប់នឹងគំនិតដែលថានាឡិកានេះគួរត្រូវបានផលិតពីលោហៈ។ បទពិសោធនេះក៏បានបំផុសគំនិតខ្ញុំឱ្យលះបង់នូវការវិនិច្ឆ័យផ្ទាល់ខ្លួនដែលយល់ថាអ្វីៗត្រូវតែមានលក្ខណៈមួយជាក់លាក់ ហើយសាកល្បងធ្វើអ្វីៗដែលថ្មីនៅក្នុងស្នាដៃសិល្បៈរបស់ខ្ញុំ”។
“ខ្ញុំមានស៊េរីគំនូរមួយឈ្មោះថា Water Mirror។ រូបភាពត្រូវបានគូរឡើងដោយផ្អែកលើផ្ទៃទឹក ហើយខ្ញុំចង់បង្កើតស្នាដៃដែលបង្ហាញផ្ទៃទឹកនឹង និងការយល់ថាវត្ថុជាច្រើន (រួមទាំងវត្ថុដែលមើលមិនឃើញនឹងភ្នែក) មានជាតិទឹកពាក់កណ្ដាល។ តាមការពិត ស្នាដៃសិល្បៈត្រូវបានបង្កើតចេញពីជ័រ ទឹកថ្នាំ និងជើងទម្រតែប៉ុណ្ណោះ ប៉ុន្តែជួនកាលពេលគំនិតរបស់ខ្ញុំ ដំណើរការ និងវត្ថុជារូបវន្តត្រូវបានប្រើនៅពេលវត្ថុធាតុប្រតិកម្ម វត្ថុធាតុនោះហាក់ដូចជាបង្ហាញជាទម្រង់ថ្មីៗ”។
រូបថតដោយ Tadayuki Minamoto
ការស្ដាប់សូរសំឡេងរបស់វត្ថុធាតុផលិតនាឡិកា ដើម្បីបង្កើតសា្នដៃសិល្បៈ
វាមានរយៈពេលបីខែមកហើយចាប់តាំងពីកញ្ញា Takayama ទៅទស្សនកិច្ចនៅរោងចក្រ Yamagata Casio។ ដោយឈរនៅក្នុងស្ទូឌីយ៉ូរបស់នាងដែលមានពន្លឺព្រះអាទិត្យចាំងដល់ យើងមើលឃើញពីដំណើរវិវឌ្ឍន៍នៃស្នាដៃរបស់នាង។ ទម្រង់រដិបរដុបដែលមានលក្ខណៈជាសិល្បៈ ឬបែបធម្មជាតិ គឺជាការរំលឹកពីវត្ថុធម្មជាតិដែលមានអត្ថិភាពតាំងពីអតីតកាលមកម៉្លេះ។
“ជាទូទៅ លក្ខណៈ ‘ភាពធន់រឹងមាំ’ របស់នាឡិកា G-SHOCK អាចបង្ហាញពីភាពខ្លាំង និងភាពជាប់ធន់ ប៉ុន្តែនៅទីនេះខ្ញុំបកស្រាយវាឡើងវិញថាមានលក្ខណៈ ‘ធម្មជាតិ’។ នាឡិកា Frogman វាស់ពីពេលវេលាដែលចំណាយនៅក្រោមទឹក ធន់នឹងសម្ពាធទឹក និងសម្របទៅនឹងចលនារបស់អ្នកនៅក្រោមទឹក។ អ្នកអាចទទួលអារម្មណ៍ពីការគិតគូរដែលផ្ដោតលើភាពលម្អិតលើចំណុចទាំងឡាយនៃការរចនា។ សម្រាប់ខ្ញុំ ខ្ញុំយល់ថាការទទួលដឹងពីពេលវេលានេះក៏ដោយសារតែវាអាចជារឿងដែលមនុស្សជួបប្រទះនៅក្នុងធម្មជាតិ។ ខ្ញុំចង់បង្កើតស្នាដៃសិល្បៈដែលចាប់យកលក្ខណៈ ‘ធម្មជាតិ’ បន្ថែមពីលើការបង្ហាញទំនាក់ទំនងជាមួយវត្ថុផ្សេងៗដែលមានអត្ថិភាពនៅជុំវិញខ្លួនយើង ដែលជាការដឹងអំពីពេលវេលាដែលចំណាយនៅក្រោមផ្ទៃទឹក នៅក្នុងសមុទ្រ និងក្នុងទម្រង់ផ្សេងទៀត”។
នាងបាននិយាយអំពីរូបរាង និងបាតនៃផ្ទៃគ្រើមរបស់វាថា “ខ្ញុំបានស្រមៃឆ្លាក់រូបទេសភាពធម្មជាតិ”។
“ខ្ញុំបានប្រើគំនិតនេះ ដើម្បីព្យាយាមចាប់យករូបរាង និងផ្ទៃថ្មដែលខ្ញុំបានជួបនៅពេលធ្វើដំណើរ និងការដឹងអំពីពេលវេលាដែលមាននៅក្នុងធម្មជាតិ។ ដំបូងឡើយ ខ្ញុំក៏ចង់ប្រើដុំថ្ម ឬកំណាត់ឈើ ប៉ុន្តែបន្ទាប់ពីបានមើលឃើញវត្ថុធាតុត្រូវបានផលិតដោយប្រើបច្ចេកវិទ្យាដំណើរការណាណូនៅរោងចក្រ Yamagata Casio រួចមក ខ្ញុំក៏ទទួលបានការបំផុសគំនិតឱ្យសាកល្បងផលិតដោយប្រើវត្ថុធាតុនេះ។ ដោយប្រើបន្ទះឈើស្ដើងៗ ខ្ញុំបានដាក់រូបភាពស្រទាប់ដែលឆ្លាក់រលកសមុទ្រនៅលើគែមថ្ម។ ការបោះបង់ទស្សនៈផ្ទាល់ខ្លួនចោល ហើយបង្កើតទម្រង់ដែលទទួលយករលកសមុទ្រ គឺជារឿងពិបាកណាស់”។
នៅជុំវិញជើងទម្រគឺមានកងរាងមូលដូចនាឡិកាដែលផលិតពីវត្ថុ រួមទាំងឈើ និងគ្រីស្តាល់ត្បូងកណ្ដៀងដែលត្រូវបានប្រើសម្រាប់នាឡិកា MR-G។
“នៅពេលខ្ញុំចាប់កាន់គ្រីស្តាល់ត្បូងកណ្ដៀងជាលើកដំបូង ខ្ញុំចាប់អារម្មណ៍យ៉ាងខ្លាំងនឹងភាពថ្លារបស់វាដែលអាចឱ្យពន្លឺឆ្លងកាត់បាន។ ខ្ញុំយល់ថាវាក៏ដើរតួជាកញ្ចក់ផងដែរ ដែលតាមរយៈនេះវាបានបំផុសគំនិតខ្ញុំឱ្យរួមបញ្ចូលលក្ខណៈនោះនៅក្នុងស្នាដៃសិល្បៈរបស់ខ្ញុំ។ ខ្ញុំចង់បង្កើតសិល្បៈរួមជាមួយនាឡិកា ដូចជានាឡិកានេះដែលមានបច្ចេកវិទ្យាកញ្ចក់ ហើយយើងនឹងរួមបញ្ចូលស្នាដៃសិល្បៈជាមួយគ្នា។ ការបញ្ចូលគំនិតផ្ទាល់ខ្លួនមិនសំខាន់ដូចកាលដែលខ្ញុំស្វែងយល់ពីវត្ថទាំងនោះ និងអនុញ្ញាតឱ្យវត្ថុទាំងនោះនាំផ្លូវខ្ញុំទេ”។
រូបថតទីមួយ៖ គ្រីស្ដាល់ត្បូងកណ្តៀងដែលប្រើនៅក្នុងដំណើរការផលិតរបស់វិចិត្រករ
រូបថតទីពីរ៖ ការពិសោធបច្ចេកទេសចាក់ពណ៌ដោយប្រើវត្ថុធាតុដូចកញ្ចក់នៃគ្រីស្តាល់ត្បូងកណ្ដៀង
រូបថតទីបី៖ ការលាបទឹកថ្នាំដោយប្រើស៊ីរាំង ដើម្បីបង្កើតសណ្ឋានបែបធម្មជាតិ
រូបថតទីបួន៖ ការធ្វើពិសោធបច្ចេកទេសចាក់ពណ៌ដោយប្រើម្សៅដែលផលិតនៅក្នុងការដំណើរការ COBARION* ដែលជាសំលោហៈដ៏ទំនើបដែលប្រើនៅក្នុងការផលិតនាឡិកា MR-G
កញ្ញា Takayama បានប្រើកងគ្រីស្តាល់ត្បូងកណ្ដៀងមួយចំនួនដែលប្រើជាលក្ខណៈធម្មជាតិ។ ចំណែកឯកងផ្សេងទៀត នាងបានលាបពណ៌ដោយប្រើបច្ចេកទេសផ្ទាល់ខ្លួន ដោយកងនីមួយៗរំលឹកដល់ទេសភាពធម្មជាតិដែលនាងបានជួបនៅតាមផ្លូវធ្វើដំណើរ។
ការបង្កើតពិភពពេលវេលាដែលមានទំនាក់ទំនងនឹងគ្នា
ការចុះទៅកាន់ស្ទូឌីយ៉ូរបស់កញ្ញា Takayama ដែលបង្ហាញពីស្នាដៃសម្រេចរបស់នាង។ ជើងទម្រហាក់ដូចជាបង្ហាញពីទម្រង់ពេលវេលាដែលទាក់ទងនឹង ‘ធម្មជាតិ’ ចំណែកឯកងរាងមូលផ្សេងទៀតហាក់ដូចជាចង់នាំអ្នកមើលទៅកាន់ទីកន្លែងផ្សេងៗ។ ដើម្បីឱ្យស៊ីគ្នាទៅវិញទៅមក ធាតុផ្សេងៗដែលរួមបញ្ចូលនៅក្នុងស្នាដៃសិល្បៈរំលឹកដល់ការដឹងអំពីពេលវេលាចម្រុះ ដោយវាកើតមានច្រើនទម្រង់។
ដូចដែលវិចិត្រករបានពន្យល់ពេលកំពុងធ្វើការ “ទោះបីជាពេលវេលាហាក់ដូចជារសាត់អណ្ដែតថេរក៏ដោយ ក៏ខ្ញុំគិតថាយើងអាចយល់ពីការពិតដែលថា ស្ថានភាព ឬមជ្ឈដ្ឋានផ្សេងគ្នាអាចមានឥទ្ធិពលលើទស្សនៈយល់ឃើញរបស់យើង។ ឧទាហរណ៍៖ ការដើរនៅឆ្នេរសមុទ្រ យើងនឹងទទួលអារម្មណ៍ដឹងអំពីទេសភាពឆ្នេរសមុទ្រ និងមើលទឹករលក។ មុនពេលអ្នកសម្គាល់ដឹង អ្នកបានដើររាប់គីឡូម៉ែត្រទៅហើយ លុះត្រឡប់មកវិញ វាហាក់ដូចជាឆ្ងាយខ្លាំងណាស់។ បទពិសោធបែបនេះអាចធ្វើឱ្យអ្នកទទួលអារម្មណ៍ដឹងផ្សេងៗពីគ្នាពាក់ព័ន្ធនឹងពេលវេលា។
“ពេលខ្ញុំកំពុងបង្កើតស្នាដៃសិល្បៈ និងធ្វើការសន្ទនាជាមួយទឹកថ្នាំ ឬវត្ថុផ្សេងទៀត (ការធ្វើអន្តរកម្មជាមួយវត្ថុដែលមានលក្ខណៈចម្បងផ្សេងៗគ្នា) ពេលនោះពេលវេលាកន្លងផុតទៅខុសពីធម្មតា។ ពេលខ្ញុំសម្រាកបន្តិច ហើយមើលនាឡិកា ជួនកាលខ្ញុំភ្ញាក់ផ្អើលខ្លាំងណាស់អំពីពេលវេលាដែលបានកន្លងផុត ឬផ្ទុយទៅវិញ ទ្រនិចនាឡិការំកិលយឺត។ វាប្រៀបបានដូចជាខ្ញុំកំពុងស្ថិតក្នុងទម្រង់ពេលវេលាដែលផ្អែកលើធម្មជាតិនៃពេលវេលាដែលទាក់ទងនឹងវត្ថុ មិនមែនការដឹងអំពីពេលវេលារបស់ខ្ញុំទេ។
“ខ្ញុំមានអារម្មណ៍ថា នាឡិកា G-SHOCK ផ្ដោតទៅលើលំហូរពេលវេលាដែលឆ្លុះបញ្ចាំងពីទម្រង់ជីវិតផ្សេងៗគ្នា”។
កញ្ញា Takayama បានអនុវត្តការចាក់ពណ៌នៅលើផ្ទៃជើងទម្រដែលផ្ដល់នូវរូបរាង និងលក្ខណៈកាន់តែដូចធម្មជាតិ។ នាងលើកឡើងពីការយល់ដឹងអំពីពេលវេលា ខណៈពេលចូលរួមក្នុងដំណើរការផលិតកម្មនៅទីនេះផងដែរ។
“ដំបូងឡើយទឹកថ្នាំបៀមជាប់ជ្រៅខ្លាំង ដូច្នេះខ្ញុំត្រូវពង្រាបផ្នែកមួយចំនួន ហើយធ្វើការលាបពណ៌ម្ដងទៀត។ ក្ដារបន្ទះត្រូវបានបង្កើតចេញពីឈើសំប៉ែតជាច្រើនផ្គុំចូលគ្នា ដូច្នេះកម្រិតពណ៌ដែលលាបពីលើវាប្រែប្រួលទៅតាមភាពទន់ ឬភាពរឹងរបស់ឈើ។ ការឆ្លាក់នៅតែបន្សល់ទុកពណ៌ខ្លះៗដែលបៀមជាប់ជ្រៅនៅក្នុងស្រទាប់ឈើទន់ ដែលបង្កើតបានជាពណ៌ចម្រុះដែលមិនអាចបង្កើតបានតាមរយៈការលាបពណ៌តែមួយស្រទាប់។ ផ្នែកខ្លះនៃដំណើរការនេះដែលមិនដំណើរតាមការគ្រោងទុកដើមបានរក្សានូវការដឹងអំពីពេលវេលាជាមួយនឹងនិរន្តរភាពដែលមិនចេះប្រែប្រួល។ លទ្ធផលគឺស្នាដៃថ្មីដែលល្អហួសពីការរំពឹងទុករបស់ខ្ញុំ។ ខ្ញុំបានបន្តបង្កើតវាម្ដងហើយម្ដងទៀត ប៉ុន្តែសម្រេចបានរូបរាងដែលអាចកើតមានដោយឯកឯងពីដំណើរការដែលខ្ញុំបានប្រើ។
“ខ្ញុំយល់ថា ក្នុងសម័យបច្ចុប្បន្ន នៅពេលការរស់នៅរបស់យើងកាន់តែមានប្រសិទ្ធផល ការកាត់បន្ថយពេលវេលាត្រូវបានចាត់ទុកថាមានតម្លៃ។ នេះជារឿងពិត ដោយសារពេលវេលាត្រូវបានវាស់ និងបញ្ជាក់ដោយផ្អែកលើមូលដ្ឋាននីមួយៗ បង្កើតបានជាកម្សោយការយល់ដឹងអំពីការពិត និងទំនាក់ទំនងរបស់យើងជាមួយវត្ថុនៅជុំវិញខ្លួនយើង។ ទោះជាបែបនេះក្ដី ក្នុងបរិបទនេះខ្ញុំឆ្ងល់ថាតើការចំណាយពេលវេលាដែលមាននៅក្នុងវត្ថុជាច្រើននៅជុំវិញខ្លួនយើង (វត្ថុដែលមានទម្រង់ស្មុគស្មាញហួសពីការយល់ឃើញរបស់យើងផ្ទាល់) អាចរក្សា និងបន្ថយអារម្មណ៍នៃការរស់នៅដាច់ដោយឡែក និងភាពឯកោ ព្រមទាំងជួយយើងរក្សាការដឹងអំពីការពិត”។
នៅចំផ្នែកកណ្ដាលនៃស្នាដៃរបស់កញ្ញា Takayama នាឡិកា FROGMAN បង្ហាញពីពេលវេលាដើរទៅមុខ។ កងគ្រីស្តាល់ត្បូងកណ្ដៀងជាច្រើនដែលមានទំហំប៉ុនគ្នានឹងមុខនាឡិកា និងជើងទម្រឆ្លាក់ដែលមានទម្រង់ខុសប្លែកពីគេ បង្ហាញពីការដឹងអំពីពេលវេលា។ រួមគ្នា ពួកវាបង្កើតបានជារលក ឬទស្សនៈដែលទំនងជាគ្របដណ្ដប់ពិភពរបស់មនុស្សលោកយឺតៗបន្តិចម្ដងៗ។
ទិដ្ឋភាពធម្មជាតិពីទម្រង់ពេលវេលាដ៏ច្រើន
Myriad
គ្រីស្ដាល់ត្បូងកណ្តៀង ឈើ ទឹកថ្នាំសំយោគ ជ័រ ប្រេង Paulownia
“កងគ្រីស្តាល់ត្បូងកណ្ដៀងដែលភ្ជាប់បង្ហាញពីទំនាក់ទំនងរវាងទម្រង់ពេលវេលាចម្រុះ។ តើនៅលើពិភពជាក់ស្ដែងមានពណ៌អ្វី ប្រសិនបើយើងផ្តោតការយល់ដឹងរបស់យើងលើទម្រង់ពេលវេលាដែលមាននៅជុំវិញខ្លួនយើង ឬតើយើងអាចរកឃើញអ្វីខ្លះនៅក្នុងនោះ?” (Natsuki Takayama)
MRG-BF1000B
ស្រោបការពារដោយទីតានីញ៉ូម៖ MR-G សម្រាប់សមុទ្រ
Bluetooth® / MULTIBAND 6 / TOUGH SOLAR /
ខ្សែផលិតកម្មលំដាប់ខ្ពស់
